isang likha mula sa isang kaibigan

Pangarap ni Pepeng Paslit

Malayo na ang aking narating
Ngunit di ko malaman ang dapat kong gawin
Saan nga ba ang dapat kong kalagyan
Naghahanap pa rin ng kahulugan
Sa paglalayag na ito
‘Di malaman kung saan ang hangin patungo
Nag-aabang ng kahihinatnan
Wala ba talaga itong kabuluhan
Sana’y tuluyan ng magwakas ang karimlan
Dahil matagal na akong naghihintay ng daan
Sa kakahawak ng lubid na ito
Lagi na lang ako ang may sakripisyo
Sunod sa kahihinatnan ng mga buwang
Mga taong may pinag-aralan kuno
Ngunit mga desisyo’y napano?
Ni katiting na matuwid ay naglaho
Ninais ko ng mabitag sa kabaliwan Subalit ayoko na pawang sunud sunuran lamang
Kaya ko naman magtaas noo
Bakit ako ngayon ang nakayuko?
Dapat na lamang bang hayaan ang iba
At sila’y maghariharian at mang-alipusta?
Dapat na ata akong tumindig at sabihin
Ako’y lalaban at prinsipyo’y ididiin
Para sa aking mamamayan
At sa adhikain ko para sa bayan
Ngunit wala akong sapat na salapi
Para maakit ang mga tao na makinig
Dahil sa higpit ng sinturon
Tanging sa kalansing ng barya ang tugon
Nasaan na ang krusadang si Gat ang simula?
Sadya bang nilamon na ng sistema?
Mga buwitreng tinukoy ni Kiko?
Sino nga ba ang may sala dito?
Sana’y maibsan na ang hapdi
Ng sugat ng kahapon at sugat ng mga sawi
Mga sugat na wala ng ihihilom pa
Kundi tanging bulak ng pagkakaisa
Sa diwa, adhika at pagkilos
Ang pinakamabisang laban sa unos
Unos na higit pa sa dekada ang tagal
Naghihingalo na sa sobrang pagal

IMULAT ANG MGA MATA,
HINDI MO BA NAKIKITA,
ANG NASA HARAPAN MO NA?
SADYA BANG BULAG NA NGA?
SA HUBAD NA KATOTOHANANG
NAKALATAG SA IYONG MUKHA!!!

Bawat isang butil ng buhangin
May bahaging dapat tupdin,
Bandilang tangan ay ating isugod,
Sindihan ang mitsa na magsilbing pusod,
Init laban sa lamig ng daluyong,
Tayo ang gagawa ng agos ng ilog,
Kahit pa lakaran ang basura’t bubog
Iisang boses ang milyong bisig,
Hindi mapupunit yaring tubig,
Gagalaw ang pader na bigkis ng isang adhika,
Pangarap sanang nabuo sa aking dalita,
Matupad kaya ng mga pag-asa ng kasalakuyan?
Gisingin ang mga leprosong tangan ay kasinungalingan,
Hindi mo ba naririnig ang hilagpos ni Juan?
Ubos na ang mga kawali para hiraman pa ng tenga,
Panahon na para hilumin ang galos ng bayang aba,
Mistulang batong sasagupa sa alon ng tubig ,
Hindi pagagapi sa matatag na tindig,

SISIKAT DIN ANG HARING ARAW MULA SA PAGLUBOG,
MULING AAHON ANG BANDILANG NALUNOD,
LILIPAD ANG AGILA NG TUNAY NA KALAYAAN,
SASAHIMPAPAWID ANG PELIKULA NG KATOTOHANAN,
MAGIGING BUO LAMANG SA PAGGANAP NG KABATAAN,
PANGARAP NA ISINULAT HINDI LANG SA PAGTULOG ANG KAGANAPAN.


-gawa ni jethro